Сүүлийн үед би хоол хүнсэндээ зарим нэг өөрчлөлтийг оруулж байгаа юм. Өнөөдрийн бичвэрээр энэхүү өөрчлөлтийг эхлүүлэхэд тус болсон нийтлэлийг та бүхэндээ орчуулан хүргэж байна.

Оросд өнгөрүүлсэн өвлийн амралт маань “идэмхий амралт байв”. Хятадад байхдаа хир баргийн идээд байдаггүй бүхэн Оросд 2-3 алхмын зайд байна. Үүнд төрөл бүрийн бяслаг, гурилан амттан, тараг, ээдэм, загас, дарсан ногоонуудыг хэлж байгаа юм. Хадам ээж маань биднийг ирнэ гээд бүх төрлийн мах, загасыг запасалсан байв. 3 долоо хоног бие маань энэ их хүнд хоолыг боловсруулахад хичээл зүтгэн гаргаж сүүлдээ дийлэхгүй дархлаа маань муудаж, би ойрын хэдэн жилдээ тусч байгаагүй ханиад тусан хэвтэрт хэд хоног байв.

Хүн тодорхой хэмжээний насанд хүрэхээр биеээ илүү ихээр сонсож сурдаг юм болов уу, хоол хүнсний хэрэглээ маань миний биеийн байдал, сэтгэл санаанд нөлөөлөөд байгааг гадарлаад байв. Удалгүй энэ нийтлэлийг олж уншаад зөн совин маань зөв байсныг ойлгон нийтлэл дээр байсан зөвлөгөөг дагаж эхэлсэн юм.

Бие маань хөнгөрөөд, илүү их эрч хүчийг мэдрэн хоол боловсруулах явц маань сайжирч байгааг эхний 7 хоногийн дараа анзаарсан. Нэг ёсондоо бие маань хүнд хоол хүнсийг боловсруулж эрч хүчээ шавхах бус харин эсрэгээрээ зөв хооллолтын ачаар илүү их эрч хүчтэй болж байна гэсэн үг юм.

Эдгээр өөрчлөлтүүд миний хүвьд хэрэгжүүлэхэд тийм ч хэцүү байгаагүй, учир нь би олон “биед муу” хүнсийг өдөр тутамдаа хэрэглэдэггүй. Үүнд фаст фуд, хиам, их хэмжээний чихэрлэг зүйлс, хийжүүлсэн ундаа гэх мэт багтаж байгаа юм.

За оршил маань нилээн урт болчихлоо. Доор би тэрхүү нийтлэлийг эх хувиар нь орчуулан хүргэж байна.

Эрүүл зөв хооллолтын хэв маягийг эхлүүлэхийг хүсэж буй хэн бүхэн асар их хэмжээний мэдээлэлтэй нүүр тулдаг. Тэр олон мэдээллээс учрыг нь олж байхаар эргээд идэж сурсан хоол хүнсээ хэрэглэх нь дээр санагдах үе бий. Олны дунд нэр хүндтэй эрүүл хооллолтын систем нь бусад ижил нэр хүндтэй системээ үгүйсгэхээс гадна, нэг хүнсний бүтээгдэхүүнийг зарим мэргэжилтэн “идэгтүн” гэж байхад, өөр нэг нь “бүү ид” гэж зарладаг.

Өөрт тохирсон хооллолтын системийг олж хэрэгжүүлэхэд зөвхөн таны туршилт болон цаг хугацаа л харуулна. Хэдэн 10 жилээр идсэн хоолны зуршлаа нэг өдрийн дотор орвонгоор нь эргүүлэх боломжгүй бөгөөд, энэ мэтээр хоол хүнсэндээ огцом хувьсгал хийх нь ихэнхдээ удаан үргэлжлэхгүй бөгөөд тун удалгүй бууж өгөхөд хүргэдэг. Хооллолт гэдэг бол биднийг даган бүхий л амьдралын турш өөрчлөгдөж хувьсаж байдаг зүйл юм. Тиймээс хоол хүнсний хэрэглээгээ зөв зүг рүү чиглүүлэхэд энгийн бас амархан хэдэн зарчимаас эхлүүлэхийг зөвлөж байна. Ингэснээр та “идэж болохгүй” хүнсний урт жагсаалттай болохгүй, харин үр дүнг нь их хурдан мэдрэнэ.

 

 

Өглөөг 1 аяга нимбэгтэй усаар эхлүүлэх.

Энэ энгийн зуршил нь өглөөг сэргэлэн цовоо эхлэхэд тусалж хоол боловсруулалтыг сайжруулна. Хэдий их ислэг амттай ч нимбэгийн шүүс нь хорт бодисуудыг гадагшлуулахад тусалдаг байна. Өдөр бүр сэрээд шүдээ угаасны дараа нимбэгтэй усаа ууж байгаарай. Ус нь бүлээн эсвэл тасалгааны хэмтэй байна, харин хүйтэн ус уухгүй байхыг зөвлөж байна. Эхэндээ нимбэгийн шүүсний 1/4- хийж байгаад дасаад ирэхээрээ 1/2 болгоорой.

 

 

Нэг удаагийн хооллолтод “цардуулан” гаралтай хоол хүнсийг амьтны гаралтай уурагтай холихгүй байх.

Нэг өдөрт заавал идэх дуртай мах эсвэл гоймонгоос шууд татгалзах хэрэггүй, тэрний оронд энэ хоёрыг салгаад хэрэглэж болно. Цардуулан төрлийн хүнсэнд бүх төрлийн гурилан бүтээгдэхүүн (талх, нарийн боов), төмс, бүх төрлийн шош, мөн түүнчлэн бүх төрлийн үр тариа орно (будаа, гурвалжин будаа, киноа гэх мэт). Амьтны гаралтай уураг гэдэг нь бяслаг, мах, далайн бүтээгдэхүүнүүд багтана (загас, сам хорхой гэх зэрэг). Цардуулан төрлийн хоол хүнс болон амьтны гаралтай уураг хоорондоо зохицохгүй тул болгосон эсвэл болгоогүй ногоонуудтай хольж иднэ. Жишээ нь та өдрийн хоолондоо ногооны салатыг гурвалжин будаатай идээд харин оройн хоолондоо загасны махыг бэлгэсэн ногоотой хольж идэж болох юм. Өөр илүү нарийн хүнсний бүтээгдэхүүнүүд хоорондоо зохицдог зарчмууд байдаг ч дээрх зөвлөгөөг дагахад хоол боловсруулалт илт сайжирна.

 

 

Жимсийг зөвхөн хоолны өмнө хэрэглэх.

Жимс жимсгэнээс шим тэжээлийг нь хүртэхийн тулд заавал хоол идэхээс 20,30 минутын өмнө буюу хоосон ходоодтой үедээ хэрэглэнэ. Эсвэл хоол идсэний дараа 3,4 цагийн дараа. Хоосон ходоодон дээр идсэн жимс эрч хүч амин дэм бэлэглэх бол хоолны дараа буюу бусад төрлийн хүнстэй идсэн жимс хоол боловсруулалтыг удаашруулан эсэх үйл явцыг эхлүүлдэг. Жимс дундаас зөвхөн авакадог л цардуулан төрлийн хүнстэй хэрэглэж болно.
Жимснүүдийн цорын ганц зохицдог хүнс бол шинэхэн навчит ногоонууд юм. Тиймээс смузинд жимс болон навчит ногоонуудыг холих нь эрүүл хооллолтын нэг жишээ юм.

 

 

Тунгаамал хүнсийг бүхлээр солих.

Айлд зочлох эсвэл гадуур хооллох үед би тунгаасан элсэн чихрээр амталсан чизкейк иддэг бол гэртээ хэзээ ч тунгаасан буюу цэвэршүүлсэн зүйлс хэрэглэдэггүй. Элсэн чихрийн оронд зөгийн бал, тунгаагаагүй наргил модны сахар, агч модны сироп эсвэл топинамбура сиропыг ашиглаж болно. Нэгдүгээр гурилын оронд бүхэл үрийн гурил, хөх тарианы гурил эсвэл гурбалжин будааны гурил ашиглана. Цагаан будааны оронд бор, улаан будаа эсвэл зэрлэг будаа ашиглаж болох юм. Гэртээ тунгаамал хүнсгүй байх нь таны хооллолтод мэдэгдэхүйц өөрчлөлтийг мэдрүүлэх болно.

 

 

Өдөр оройн хоолыг шинэ ногооны салаттай идэх.

Салат гэдэг нь нийслэл салат эсвэл цезарь салатыг хэлээгүй юм шүү, харин олон төрлийн шинэ ногоог хольсон салатыг хэлж байгаа юм. Дангаар нь идсэн хэдэн ширхэг өргөст хэмх эсвэл лууван ч салатанд тооцогдоно. Ногооны ферментүүд болон эсэл нь дараа дараагийн хоолыг боловсруулахад тустай юм. Үүнээс гадна ногооны салатаар хоолоо эхлүүлэх зуршил нь таныг цаашид илүү ихээр ногоог хоол хүнсэндээ хэрэглэдэг болоход тустай.

Аажим аажмаар жижиг алхмуудыг хийж аль нэг тал руу туйлшрахгүй байх нь чухал юм. Өнөөдрөөс эхлээд өөрчилж чадах зүйлээсээ эхлээрэй. Хувьсал хийх гэж яаралгүй бага багаар сайжрах арга замыг сонгоорой эрхэм уншигч минь.

Эх сурвалж: salatshop

 

Нийтлэл: Dasha Lulu





Энэхүү нийтлэлийг зөвхөн редакцын зөвшөөрөлтэйгээр хувийн блог болон вэб хуудсан дээр дахин нийтлэн ашиглаж болохыг анхаарна уу!